Соторутааҕыта Орто Халымаҕа Дьокуускайтан “Харысхал” аһымал пуонда кэлэн сэргэх тэрээһин тэрилиннэ. Пуонда дириэктэрэ Вера Душкевич салайааччылаах бөлөххө “Чудеса кино” медиа-анимационнай устуудьуйаны салайар Пётр Николаев, инбэлииттэри реабилитациялыыр медицинскэй-социальнай уонна профессиональнай техникум Адаптивнай физкультураҕа сулууспатын салайар Пётр Давыдов, Дьокуускайдааҕы “Инсайт” психологическай киин дириэктэрэ, психолог Татьяна Сабарайкина кэлэн олус туһалаах көрсүһүү буолла. Кинилэри кытта Орто Халыма орто оскуолатыгар оҕо саадын үлэһиттэрэ, физкультураҕа инструктордар, оскуола учууталлара, психологтар, тренердэр, социальнай педагогтар, салалта көрсөн ирэ-хоро сэһэргэстилэр, ыйытыыларыгар толору хоруйдары ыллылар. Мустубут дьоҥҥо Вера Петровна Саха сиригэр эрэ буолбакка, Россияҕа киэҥник биллэр пуонда үлэтин туһунан сырдатта. Ол кэнниттэн туһааннаах тиэмэлэринэн семинардар ыытылыннылар. „Чудеса кино“ медиа-анимационнай студияны салайар Пётр Николаев инбэлиит уонна доруобуйаларынан хааччахтаах оҕолорго, кинилэр төрөппүттэригэр „Эбру“ ууга уруһуй көрүҥэр, „Кумихимо“ сабынан өрүү ньыматыгар маастар-кылаас көрдөрдө. Россия үтүөлээх тренерэ Пётр Давыдов физкультура учууталларыгар, оҕо саадын инструктордарыгар уонна оҕолорго пауэрлифтиҥҥэ дьарык тэрийдэ, педагогтарга доруобуйаларынан хааччахтаах оҕолору эрчийэргэ туспа сүбэлэри биэрдэ. Татьяна Сабарайкина инбэлиит оҕолордоох төрөппүттэри кытта көрүстэ. Кинилэр дьиэ кэргэттэригэр ураты оҕо улаатарын, итиниэхэ бэйэ кыаҕын сөптөөхтүк туһанары, психолгическай сүбэлэри биэрдэ. Вера Душкевич физкультура учууталларыгар, теренердэргэ адаптивнай физкультура туһунан сиһилии кэпсээтэ. Бу курдук биһиги улууспутугар үс күн устата киэҥ хабааннаах уонна олус туһалаах үлэ тэрилиннэ.
