Бүлүүтээҕи Олонхо дьиэтигэр кэлэр сайын ыытыллыахтаах Олонхо ыһыаҕын өрөспүүбүлүкэтээҕи тэрийэр кэмитиэтин культурнай бырагыраамаҕа хамыыһыйата үлэлээтэ. Дьокуускайтан кэлбит хамыыһыйа кыттыылаахтара: кылаабынай режиссер Валентина Якимец, кылаабынай хореограф Ирина Аввакумова, сценарий суруйааччы Зоя Попова, ассистена Майя Власьева, Олонхо театрын үлэһитэ Мария Григорьева, кылаабынай худуоһунньук Михаил Егоров, научнай консультант Евдокия Сергина, көстүүмнэргэ кылаабынай худуоһунньук Сардана Федотова мустубут дьоҥҥо бэйэлэрин көрүүлэрин билиһиннэрдилэр, санааларын атастастылар, элбэх сүбэ-ама биэрдилэр.

Фото: ЯСИА.RUЯСИА.RU

«Ыалдьыттар сөҕөллөрүн-махтайалларын курдук Олонхо ыһыаҕын тэрийиэхтээхпит«, — диэн эттилэр. Ол туһугар бүлүүлэр сахалыы иһити-хомуоһу оҥорууга, оһуокайга уонна да атын хайысхаларга элбэх уратылаахтарын, ону барытын көрдөрөрү тоһоҕолоон бэлиэтээтилэр .

Олонхо ыһыаҕар бүлүүлэр бэлэмнэрин туһунан кылаабынай режиссер Валентина Якимец санаатын бу курдук үллэһиннэ: “Дьон көхтөөхтүк ылсан үлэлэһэр санаалаахтара көстөр, уустар, норуот маастардара, иистэнньэҥнэр үтүө санаалаахтарыттан киһи үөрэр”.

Уустар түмсүүлэрин салайааччыта Иннокентий Акимов ким тугу дьарыктанарынан бэлэмнэнэ сылдьалларын, чороон оҥороллорун билиһиннэрдэ. Улахан тэрээһин бэлэмигэр улуус дьаһалтата, культура үлэһиттэрэ, оскуолалар дириэктэрдэрэ, нэһилиэктэр баһылыктара бииргэ үлэлиэхтээхтэрин, хаалбыт кэмҥэ түмсүүлээхтик тэринэргэ этиннэ.

Салгыы мас, тимир уустара, иистэнньэҥнэр секцияларынан үлэлээтилэр, чуолкай тугу оҥороллорун быһаарыстылар.

Көрсүһүү түмүктэниитэ культура управлениетын салайааччыта Сергей Шамаев уустарга Николай Степановка, Николай Гоголевка уо.д.а. махтал суруктары туттарда.

Фильмы,Валентина Якимец,Ирина Аввакумова,Михаил Егоров,