Войти в почту

Майатааҕы Аркадий Новиков ,,Көөчөөн-көрө“ мини-театр гастроллуур

Мэҥэ-Хаҥалас улууһун Майатааҕы Аркадий Новиков ,,Көөчөөн-көрө“ мини-тыйаатыра тохсунньу 17 күнүттэн гастролга айанныыр. Тыйаатыр артыыстара Хаҥалас уонна Өлүөхүмэ улуустарыгар Аркадий Новиков уонна Туйаара Стручкова айымньыларынан ,,Мама, мин таптаатым“ (реж.Данил Осипов) испэктээҕи көрдөрүөхтэрэ. Көрдөөх-күлүүлээх испэктээх бастакынан Хаҥалас улууһун Нөмүгү олохтоохторугар көрдөрүллүө. Онтон тохсунньу 18 күнүгэр артыыстар Тиит-Арыыга тиийиэхтэрэ. Сарсыныгар Үөдэй нэһилиэгэр ыалдьыттыахтара. Салгыы, тохсунньу 20 күнүгэр, Өлүөхүмэ улууһун Хоротугар, 21 -Үҥкүргэ, 22 -Улахан Муҥкуга, 23-Кээччигэ, 24 – бастакы уонна киин Абаҕаларга, 25 — Куду-Күөлгэ, 26 -Токкоҕо, 27 -Бэс Күөлгэ, 28 -Кыыллаахха, 29 -Дабааҥҥа, 30 — I Нөөрүктээйигэ, 31-II Нөөрүктээйигэ испэктээкиллэр туруоруллуохтара. Олунньуттан артыыстар троитскайдарга, Өлүөхүмэ куоратын олохтоохторугар көрдөрөн баран, Хаҥалас улууһун хабан, улуустарыгар эргиллэн кэлиэхтэрэ. Олунньу 3 күнүгэр — Кытыл Дьураа, сарсыныгар Улахан Аан, онтон Уулаах Аан, нөҥүө күн Өктөм нэһилиэктэригэр көрү-күлүүнү көҕүлүттэн тутуохтара. Көрөөччүлэр ,,Көөчөөн-көрө“ мини-тыйаатыр артыыстара: Варя Егорова, Айаан Стручков, Айаан Верховцев оонньуулларын көрүөхтэрэ, салайааччы Анна Охлопкова, ааптар Туйаара Стручкова-Огдооччуйа үлэлэрин кытта билсиэхтэрэ.

Майатааҕы Аркадий Новиков ,,Көөчөөн-көрө“ мини-театр гастроллуур
© ЯСИА.RU